20. júlí 2019 08:27

Skólasetning

Stórutjarnaskóli verður settur fimmtudaginn 22. ágúst nk. kl 16:00. Kennsla í leik- og grunnskóladeildum hefst daginn eftir, kl 8:00 í leikskóla og kl 8:30 í grunnskóla. Kennsla í tónlistardeild hefst nokkrum dögum síðar. - Vakin er athygli á að skóladagatal næsta skólaárs má finna með því að smella á flipann skóladagatal hér til vinstri.

meira...

3. júní 2019 18:40

Stórutjarnaskóla slitið

Það er svo bágt að standa í stað

Stórutjarnaskóla var slitið s.l. föstudagskvöld þann 31. maí við hátíðlega athöfn í sal skólans. Fjórir nemendur útskrifuðust úr 10. bekk að þessu sinni og einn úr leikskóla. Leikskólinn mun þó starfa áfram fram til föstudagsins 12. júlí.

Í skólaslitaræðu sinni vitnaði Ólafur Arngrímsson skólastjóri m.a. í 11 ára gamla skólaslitaræðu sína og spurði, eins og Jónas Hallgrímsson forðum: „Höfum við gengið til góðs götuna fram eftir veg?“ Í þessari 11 ára gömlu skólaslitaræðu var Ólafur að velta fyrir sér skeytingarleysi samfélagsins gagnvart því sem gefur lífinu gildi og hvort við kynnum að meta lífsgæðin sem við teljum svo sjálfsögð. Hefur okkur eitthvað farið fram á þessum 11 árum?

meira...

24. maí 2019 20:23

Færeyjaferð

Skólaferð 9. og 10. bekkjar

Um hádegisbil s.l. miðvikudag lögðu 9. og 10. bekkur af stað í útskriftarferð sína til Færeyja. Samkvæmt hefð höfðu skólafélagar þeirra kvatt 10. bekkinn með hugljúfum serimóníum við sundlaugina nokkru fyrr og sameiginlega snæddu þau saman pizzur og drukku gos í kveðjuskyni. Helen er bílstjóri í ferðinni á sínum skólabíl og Anita fararstjóri, enda af færeyskum ættum og vel kunnug í eyjunum. Milli landanna er þó farið með skipinu Norrænu, því enda þótt skólabíll Helenar sé afbragðsgóður þá dugar hann ekki í millilandasiglingar. Skólaferðin hefur gengið vel til þessa og væntum við sem heima sitjum að allt gangi að óskum og nemendur, fararstjóri og bílstjóri skemmti sér hið besta. Myndir frá hugljúfu „kveðjustundinni“ má sjá hér.

meira...

24. maí 2019 14:10

Vorþema 2019 - föstudagur

Svalur lokadagur

Í dag var síðasti dagur vorþemadaga. Við fengum góða gesti í heimsókn sem voru tveir Kiwanismenn úr Mývatnssveit, en Kiwanishreyfingin gefur 1. bekkingum allra grunnskóla í landinu reiðhjólahjálma ár hvert. Þá var Ingibjörg skólahjúkrunarfræðingurinn okkar mætt og sýndi okkur fram á mikilvægi þess að nota alltaf reiðhjólahjálma þegar við hjólum. Loks var það hún Selma sem kom frá lögreglunni og ræddi líka um hjálmanotkun og skoðaði svo hjól nemenda, en í dag var einmitt hjóla- og leikjadagur.

meira...

23. maí 2019 16:06

Vorþema 2019 - fimmtudagur

Rafmagnaður dagur

Fyrir hádegið í dag skiptust nemendur í þrjá hópa sem allir reyndu sig við þrjú verkefni. Eitt verkefnið var að fara á skólabíl Gunnars Halls í Birkihlíð þar sem Frissi húsvörður tók á móti mönnum og sýndi þeim heimarafstöðina í þar. Það var eins konar framhald af orkuþemanu okkar og hugsað til að bera litla heimilisvirkjun saman við stóra og öfluga virkjun ætlaða fyrir fjölda heimila og fyrirtækja.

meira...

22. maí 2019 18:00

Vorþema 2019 - miðvikudagur

Lífríkið í fókus

Í dag var fyrst og fremst unnið með líffræðilegan fjölbreytileika. Nemendum var skipt í hópa sem könnuðu lífríki tjarnanna austan við skólann. Veidd voru síli og önnur smádýr og þau skoðuð og rannsökuð. Einnig rannsökuðum við fuglalífið í kringum skólann, töldum tegundir og skoðuðum á hvernig vistsvæðum tegundirnar virtust halda sig.

meira...

21. maí 2019 21:20

Vorþema 2019 - þriðjudagur

Þetta var sko ekkert slor!

Í dag var farið með alla nemendur skólans, nema þau fjögur yngstu í leikskólanum, í ferðalag austur yfir Fljótsheiði. Ferðin var sérstaklega sniðin að orkuþemanu sem við höfum verið að fjalla um í Grænfánaverkefninu í vetur. Fyrst var litið við í Laugafiski en þar má sjá hvernig hausar og hryggir af fiski eru þurrkaðir við jarðhita og blástur frá rafmóturum. Merkileg vinnsla þar sem framleidd er verðmikil vara til útflutnings.

meira...

16. maí 2019 08:43

Nemendur í Stórutjarnaskóla fræðast um verkalýðsmál

Það er ákaflega mikilvægt fyrir ungt fólk sem er að hefja þátttökuí atvinnulífinu að fá fræðslu um um réttindi og ekki síður skyldur sínar á vinnumarkaði. Eitt af hlutverkum stéttarfélaga er að heimsækja grunn- og framhaldsskóla landsins og fræða þennan hóp þar um.