10. maí 2017 13:16 (1 lesandi hefur sagt álit sitt.)

Meira í dag en í gær

Lokatónleikar nemenda í tónlistardeild Stórutjarnaskóla

Eins og fram kemur í skólanámskrá Stórutjarnaskóla er tónlistarkennslan og nám nemenda í tónlistardeild fléttuð við annað starf Stórutjarnaskóla.Tilgangurinn er annars vegar viðleitni til að smita tónlistariðkun og tónlistaruppeldi inn í almennt starf skólans og hins vegar sá að skipulagslegar aðstæður í skólanum og ekki síður fjarlægðir innan skólasvæðisins gera það nauðsynlegt fyrir nemendur að fá að stunda sitt tónlistarnám innan daglegs skólatíma. Fyrir nemendur er það mikilvægt að fá tækifæri til að sinna sínum þörfum og löngunum til sköpunar á þessu sviði og aðgengileg leið til að finna fyrir þeirri tilfinningu að geta „meira í dag en í gær“.

Þetta fengu svo að upplifa allir þeir sem hlýddu á vortónleikana sl. föstudag. Nemendur stóðu sig einstaklega vel, hvort sem þeir komu fram einir eða í hóp. Efnisskráin var fjölbreytt, einleikur, tvíleikur, einsöngur, tvísöngur, hljómsveitir og kórar. Allir nemendur skólans komu fram og sumir í hverju hlutverkinu af öðru. Það læddist fram sú tilfinning hjá áheyrenda að þessir tónleikur væru „með al-besta móti“. Fyrsta lag tónleikanna var Sagan af Sigga, ljóð eftir Steingrímur Arason og lag Jóns Ólafssonar. Það var eldri kór og fjórar stúlkur, þær   Unnur Jónasdóttir, Rannveig og Þórunn Helgadætur og Marge Alavere sem sungu einsöng. Þetta lag fluttu nemendur fyrst á umhverfis- og lýðheilsuþingi skólans fyrr í vor. Síðan kom fram hver nemandinn af öðrum, alls voru flutt átján góð og skemmtileg atriði.
Tónlistarbúðir sem nemendur tónlistardeildarinnar tóku þátt í undir vorið skiluðu sínu. Þeir nemendur spiluðu, allir í einni hljómsveit, þrjú síðustu lög tónleikanna. Lokalagið samdi Jaan Alavere, annar tveggja tónlistarkennaranna fyrir þetta tækifæri og þennan hóp nemenda. Lagið heitir „sumarfrí“, dillandi fjörugt og skemmtilegt og skilaði svo sannarlega sumarfrísstemningu til áheyrenda.  Marika deildarstjóri og Jaan eiga miklar þakkir skilið fyrir að hafa staðið fyrir  þessari góðu skemmtun ásamt nemendum. Myndirnar tala sínu máli.  Myndir hér.

Myndir: jr

Til baka

yfirlit frétta