12. júní 2020 10:33

Sigló

Menningarferð 6.-10. bekkjar

Rétt fyrir kóvid fóru nemendur í 6.-10. bekk ásamt kennurum í heilmikla menningarferð til Siglufjarðar með viðkomu á Listasafni Akureyrar og á Dalvík. Dagurinn var hinn ánægjulegasti og veitti mörgum nemendum innblástur í verkefnaskilum og hugmyndavinnu næstu vikurnar á eftir. Nemendur fengu leiðsögn um hinar ýmsu sýningar á Listasafninu af Guðrúnu Pálínu Guðmundsdóttur fræðslustjóra safnsins og sáu meðal annars sýninguna Faðmar (Hrafnhildur Arnardóttir-Shoplifter) og Línur, samsýningu átta listamanna frá ólíkum löndum. Að lokum fengu nemendur að kíkja inn á þá óopnaða sýningu sem heitir Sköpun bernskunnar.

Þá var haldið til Dalvíkur þar sem stoppað var á Byggðasafninu Hvoli með sérstaka áherslu á að skoða Jóhannsstofu betur þekktan sem Jóhann risa. Að því loknu var snætt hjá þeim félögum Gísla, Eiríki og Helga. Lokamarkmið ferðarinnar var svo Síldarminjasafnið á Siglufirði sem er bæði stórt og glæsilegt safn sem endurspeglar virkilega áhugaverða sögu Íslendinga um þróun fiskveiða, menningar, byggðar og atvinnuhátta. Nemendur höfðu undirbúið sig að heiman m.a. með því að taka viðtal við einhvern sem kunni frásagnir af Síldarævintýrinu. Frásagnir nemenda af þessum viðtölum voru virkilega skemmtilegar og sögðu frá alls kyns smáatriðum um þá sérstöku stemningu sem virðist hafa umlukið þessa tíma og var því magnað að fá „raunmynd“ af þessu tímabili. Til stóð að vinna stærra samvinnuverkefni sem afurð þessarar ferðar en því miður rændi heimsfaraldurinn okkur tækifærinu. En við kennararnir urðum þess þó varir að ferðin hafði tilætluð áhrif, listin vakti hrifningu og veitti innblástur. Mikilvægi listar, ásamt virðingu okkar fyrir þeirri sögu sem bindur okkur saman, sannaði gildi sitt í þessari stórskemmtilegu ferð. Njótið myndanna hér.

Til baka