3. júní 2019 18:40

Stórutjarnaskóla slitið

Það er svo bágt að standa í stað

Stórutjarnaskóla var slitið s.l. föstudagskvöld þann 31. maí við hátíðlega athöfn í sal skólans.  Fjórir nemendur útskrifuðust úr 10. bekk að þessu sinni og einn úr leikskóla. Leikskólinn mun þó starfa áfram fram til föstudagsins 12. júlí.

Í skólaslitaræðu sinni vitnaði Ólafur Arngrímsson skólastjóri m.a. í 11 ára gamla skólaslitaræðu sína og spurði, eins og Jónas Hallgrímsson forðum: „Höfum við gengið til góðs götuna fram eftir veg?“ Í þessari 11 ára gömlu skólaslitaræðu var Ólafur að velta fyrir sér skeytingarleysi samfélagsins gagnvart því sem gefur lífinu gildi og hvort við kynnum að meta lífsgæðin sem við teljum svo sjálfsögð. Hefur okkur eitthvað farið fram á þessum 11 árum?

Þær Dagný Pétursdóttir og Berglind Gunnarsdóttir frá kvenfélagi Ljósvetninga,  afhentu útskriftarnemum „praktískar“ gjafir að venju og að þessu sinni hlaut Salbjörg Ragnarsdóttir viðurkenningu danska sendiráðsins fyrir bestan árangur í dönsku.
 
Ýmsar breytingar eru fyrirsjánlegar í starfsmannahaldi skólans. Laufey Eiríksdóttir, sem hefur séð um sérkennslumálin í vetur auk þess að koma reglu á skjalageymslu skólans, lætur nú af störfum. Einnig munu láta af störfum þær Aðalheiður Kjartansdóttir, sem stýrt hefur mötuneyti skólans í um 12 ár, og Agnes Guðbergsdóttir, sem líklega hefur starfað samtals í 24 ár við skólann. Við þökkum þessu ágætu konum kærlega fyrir vel unnin störf og óskum þeim alls hins besta í framtíðinni.

Ólafur þakkaði einnig Valgerði Jónsdóttur á Vöglum fyrir höfðinglega gjöf til skólans en hún gaf skólanum leirbrennsluofn. Einnig kallaði Ólafur karlmennina í starfsliði skólans upp til sín og færði þeim blóm.

Að formlegri dagskrá lokinni skoðuðu gestir fjölbreytta sýningu á handverki nemenda og fengu svo að venju ís og ávexti í matsalnum. Myndir hér.

Myndir: jr

Til baka

yfirlit frétta