6. febrúar 2020 15:28

Dagur leikskólans 6. febrúar 2020

Sjötti febrúar er merkilegur dagur í sögu leikskólans því það var á þessum degi árið 1950 sem frumkvöðlar leikskólakennara stofnuðu fyrstu samtök sín, eða fyrir sléttum 70 árum.

Þetta er í 13 skiptið sem Dagur leikskólans er haldinn hátíðlegur. Á þessum degi eru allir sem starfa í leikskólum hvattir til að halda upp á daginn og nýta hann til þess að kynna hið mikilvæga starf sem fram fer í leikskólum landsins. Dagur leikskólans er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla.

Til að stuðla að góðum tengslum leik-, grunn-, og tónlistarskóla er reynt að nýta þá aðstöðu og þann mannauð sem Stórutjarnaskóli hefur yfir að ráða. Nemendur læra að fara eftir þeim reglum sem gilda í skólanum almennt og þeir þjálfast í samskiptum við aðra á hinum ýmsu aldursstigum. Nemendur leikskólans kynnast því starfi sem bíður þeirra í grunnskóla og þeir læra að líta á Stórutjarnaskóla sem skólann sinn. Nemendur grunnskólans fá að sjálfsögðu einnig tækifæri til að halda tengslum við leikskólann. Börnin í Tjarnaskjóli hafa fjölbreyttan hóp kennara sem kemur að námi þeirra og starfi.

Í vetur eru 7 börn í leikskólanum, það yngsta varð tveggja ára nú í janúar, fjögur börn eru 4 ára og þau elstu tvö eru fimm ára. Þetta er góður hópur sem nær vel saman og unir sér vel í fjölbreyttu starfi og leik. Samstarf við grunnskólann hefur alltaf verið nokkuð mikið þau 19 ár sem þessi samrekstur hefur verið. Elstu börn leikskólans, skólahópur fær samkennslu með hópi 1, í íslensku, handmennt, smíðum, kór, stærðfræði, íþróttum og sundi. Nemendur grunnskólans koma í leikskólann og lesa í samverustundum og þá er starf í leiskóla valgrein hjá elstu nemendum skólans.

Allar hátíðir og hefðir skólans eru sameiginlegar eins og árshátíð, öskudagur, þorrablót og menningarstundir.

Segja má að samþætting leik- og grunnskólastigs í Stórutjarnaskóla eigi sér fyrst og fremst rætur í tveimur þáttum. Annars vegar uppeldis- og kennslufræði en hins vegar skólapólitík, þ.e viðleitni til að bregðast við fólksfækkun á skólasvæðinu með því að hagræða í skólarekstrinum og ná fram betri nýtingu á húsnæði, aðstöðu og starfsfólki.

Síðastliðinn vetur var unnið að því að færa námsvísa leikskólans í myndrænt form, þar sem dregið er fram í myndum hvernig við störfum og uppfyllum markmið Aðalnámskrá leikskóla. Námssvið leikskólans eru fjögur: læsi og samskipti, heilbrigði og vellíðan, sjálfbærni og vísindi, sköpun og menning. Í tilefni af Degi leikskólans birtum við þessa myndrænu námssvísa á heimasíðu skólans.

Myndir frá starfi vetrarins. myndir: leikskólinn

Til baka