30. desember 2021 12:03

Litlu-jól 2021

Litlu-jól Stórutjarnaskóla voru haldin föstudaginn 17. desember. Hver námshópur byrjaði á því að fara í sína heimastofu þar sem nemendur áttu hátíðlega stund með sínum umsjónarkennara. Lesin var jólasaga og skipst var á pökkum og kortum. Að því loknu var hátíðarmálsverður í matsal skólans þar sem nemendur, starfsfólk og skólabílstjórar borðuðu dírindis-jólamat sem Sardar og Guðbjörg höfðu framreitt. Möndluverðlaun voru veitt og einnig voru veitt verðlaun fyrir stærðfræðiþraut sem nemendur og starfsfólk höfðu spreytt sig á í desember.

Að lokinni jólamáltíð var þakkað fyrir sig og gengið fram í fallega skreyttan salinn. Þar hófst dagskrá á því að Grete Alavere las jólaguðspjallið og séra Gunnar Einar sagði nemendum söguna um gistihúsaeigandann. Þá var dansað í kringum yndislegt jólatré sem starfsmaður Skógræktarinnar á Vöglum færði okkur fyrr í vikunni og nemendur skreyttu. Sá Ármann tónlistarkennari um undirspil og forsöng. Skyndilega birtust tveir skemmtilegir jólasveinar sem slógust í hópinn og sungu og trölluðu um stund og gáfu öllum mandarínur. Litlu-jólum lauk eins og endra nær á því að allir sungu saman „Heims um ból“. Myndir hér.

Nemendur mæta aftur í skólann kl. 8:30 þriðjudaginn 4. janúar 2022.

Myndir: jr

Til baka

yfirlit frétta