Um námsmat

Leikskóli

 
Einn af þáttum leikskólastarfsins er að leggja mat á framfarir nemenda og starfið í skólanum. Helstu matstæki eru gátlistar þar sem lagt er mat á þroska nemenda. Hljóm 2 er próf sem lagt er fyrir elstu nemendur leikskólans í hljóðgreiningu. Einnig fer fram svokallað huglægt mat með samtölum starfsfólks og er það gert fyrir foreldraviðtöl. Þá fá elstu nemendurnir að spreyta sig á heyrnrænni stafaþekkingu þrisvar sinnum á vetri.

Grunnskóli

 
Öllum grunnskólum landsins eru settar ákveðnar reglur að fara eftir varðandi námsmat. Þrátt fyrir það hafa skólarnir visst svigrúm til að útfæra aðferðir sínar og ákveða það form, sem þeir vilja hafa á námsmatinu. Hér á eftir eru tíunduð þau grundvallaratriði sem gilda varðandi námsmat í Stórutjarnaskóla. Nánar er gerð grein fyrir námsmati og matsaðferðum í hverri námsgrein í námsvísum hópanna, sjá heimasíðu skólans.

 
a) Foreldraviðtal í október/nóvember: Þar er munnlegt mat lagt á alla

    þætti sem varða nám og skólavist nemandans.

 
b) Haustmat (miðsvetrarpróf):  Hefðbundin próf. Alltaf gefið fyrir

   íslensku, stærðfræði, ensku og dönsku. Aðrar greinar samkvæmt

   nánari ákvörðun kennara. Einnig gefið fyrir ákveðna almenna þætti

   (hegðun, vinnusemi, almenna umgengni, félagsþroska o.fl.). Skrifleg

   skil á námsmatsblaði ásamt foreldra- og nemendaviðtölum.

   Miðsvetrarpróf fara fram í janúar.

 
c) Vormat, lokamat í lok skólaárs: Gefið fyrir allar greinar, ýmist byggt á

   hefðbundnum prófum eða öðrum matsaðferðum. Einnig gefið fyrir

   ákveðna almenna þætti. Skrifleg skil á námsmatsblaði.

 
Tónlistarskóli

 
Árspróf eru tekin þegar nemandinn er tilbúinn til þess að mati kennara. Þar leika nemendur a.m.k. tvö lög fyrir prófdómara. Einkunn hans ásamt umsögn kennara grundvallar síðan vetrareinkunn, sem er í umsagnarformi og er gefin að vori.

 

Breytt námsmat

Skólaárið 2020-2021 tók gildi breytt fyrirkomulag á námsmati grunnskóladeildar Stórutjarnaskóla. Námsmatið er í samræmi við Aðalnámskrá grunnskóla um hæfnimiðað nám. Tilgangurinn er margþættur, t.a.m. að gera það meira upplýsandi og leiðbeinandi fyrir nemendur og foreldra. Jafnframt að aðgreina mat á námsárangri frá öðrum þáttum eins og samvinnu, framkomu og ástundun. Þeir þættir munu birtast í sérstökum lið sem heitir lykilhæfni á einkunnaskjali.

 
Í breytingunni felst samræming á birtingu námsmatsins í öllum bekkjum skólans. Það verður horfið frá einkunnarorðum í 1.-5. bekk og tölum í 6.-9. bekk. Áfram verða gefnir bókstafir við lok 10. bekkjar eins og reglur segja til um.

 
Tekin verða upp svokölluð hæfnikort þar sem árangur nemenda birtist miðað við gefin viðmið fyrir 4. bekk, 7. bekk og 10. bekk. Gefið verður fyrir eftir litaflokkum, rauður, gulur, grænn og blár, eftir því hvernig tekist hefur til við að ná settum hæfniviðmiðunum. Blár merkir framúrskarandi hæfni náð; grænn merkir hæfni náð; gulur merkir á góðri leið en þarfnast þjálfunar; rauður merkir hæfni ekki náð.

 
Markmiðin eru:

 
-    að kanna að hve miklu leyti nemandi hefur náð tilskyldum

     hæfniviðmiðum/markmiðum

-    að upplýsa nemanda og foreldra um hans námsstöðu

 
-    að matið sé leiðbeinandi og hvetjandi

 
-    að greina hverjir þurfa á sérstakri aðstoð að halda

 
-    að leiðbeina nemendum um námið og hvernig þeir geta náð settum

     viðmiðum

 
-    Að námið sé einstaklingsmiðað og komi til móts við þarfir hvers og eins.